Nagdangat na sa masobra 3.3 million nga mga indibidwal nagikan sa 900,000 ka pamilya ang naapektuhan matapos ang pagwaswas sang nagligad nga kalamidad sa pungsod.
Santo sa data sang National Disaster Risk Reduction and Management Council (NDRRMC) kahapon, 1.1 million indibidwal ukon 270,000 pamilya ang na-displace kag gin-evacuate padulong sa evacuation centers ukon sa iban nga lugar.
Nakita man sa data sang ahensya nga yara sa 16 ang ila nga narecord nga napatay kun sa diin napulo diri ang nakumpirmar na samtang ang anum ang ginapaidalom pa sa validation.
Ang rason sang pagkapatay sang mga ini ang bangud sa landslide ukon nalumos.
May yara sang duha ka inbidwal ang narecord sa Calabarzon kag Northern Mindanao samtang ang apat ang nasamaran sa Northern Mindanao kag CAR.
Apisar nga mas madamo ang narekord nga death sang PNP nga yara sa 34, ginpaathag sang NDRRMC nga nagpaidalom sa maidid nga validation ang narekord nga mga napatay gani ginalauman nga magasaka pa ang numero sa mga masunod nga adlaw.
Samtang, nagdangat na sa 104 ka mga lugar sa pungsod ang napaidalum sa state of calamity bangud sa kahalitan nga ginbilin sang nagligad nga Bagyong Carina, Butchoy kag Habagat.
Yara sa 57 ang sa Central Luzon, 24 ka mga lugar sa Calabarzon, 17 sa NCR, tatlo sa Mimaropa, duha sa Soccsksargen kag isa sa Davao.
