Masobra P30,000 ang balor sang suspected shabu nga narecover gikan sa tatlo ka mga persona sa separado nga mga drug buybust operation nga ginpatigayon sa Negros Occidental.
Nadakop ang isa ka 22 anyos nga lalaki sa ginpatigayon nga drug buybust operation sang Hinobaan Municipal Police Station sa Sitio Casagnao, Barangay Pooc, Hinobaan, Negros Occidental.
Ang suspetsado ang ginkilala kay Michael Dayanan, single kag residente sa Purok 5, Barangay 2 Poblacion, Hinobaan.
Narecover diri ang walo ka sachet sang suspected shabu kalakip na ang buybust item, P500 nga buybust money, isa ka keypad nga cellphone, P88 nga cash kag isa ka unit sang motorsiklo.
Ang iligal nga droga nga narecover ang ginabanta nagabug-at sang 0.12 grams kag nagabalor P12,000.
Samtang nadakop man ang lalaki nga ginkilala kay Rene Yulo, 49 anyos nga residente sa Barangay Poblacion, Bago City sa drug buybust operation nga ginpatigayon sang Bago City Police Station.
Nakuha diri ang siyam ka sachet sang suspected shabu nga may estimated market value nga P6,120.
Samtang nadakop man ang ginkilala kay Dave Albistor sa buybust operation sang Talisay City Police Station sa Purok Sampaguita, Barangay Zone 4, Talisay City.
Nakumpiskar diri ang 13 ka sachet sang suspected shabu nga ginabanta nagabug-at sang tatlo ka gramos kag nagabalor P20,400.
Ang mga suspetsado ang nakahunong na sa tagsa ka mga Police Stations para sa nagakaigo nga disposisyon.
