Tatlo ka mga anggulo ang ginalantaw nga rason sang pagpanginmatay sang isa ka 19-anyos nga lalaki sa Circumferential road sa Brgy. Bata sa ciudad sang Bacolod kahapon.
Ini ang ginpahayag ni Bacolod City Police Office (BCPO) spokesperson Police Lt. Colonel Ariel Pico may angut sa kamatayon ni Khurjet Arroz sang Brgy. Singcang Airport, Bacolod City.
Suno kay Pico, nag-istorya man kahapon ang pamilya sang biktima sa hepe sang Police Station 3 nga si Police Lt. Colonel Pangue kag gintuad sang mga ini ang posible rason sang pagtiro sang 19-anyos sang iya kaugalingon.
Ini ang ginalakipan sang problema sa pamilya, problema sa paghigugma kag depression.
Suno man kay Pico, gintuad sang pamilya nga “secretive” sa ila ang biktima.
Madumduman nga nagsakay sa isa ka taxi nagikan sa Ayala Malls sa Gatuslao Street ang biktima kag mapadul-ong kuntani sa Bacolod-Silay Airport.
Suno sa taxi driver nga si Ramilo Medina, samtang nagabiyahe sila sang biktima, nagasugid ini sa iya nga tuman ka dako sang iya problema.
Sang gin-usisa ni Medina kun ano ang iya problema, wala man ini nagsabat.
Suno sa taxi driver, hinali na lang nga nagpagwa sang caliber .45 pistol ang biktima kag nagahana nga tiruhon ang iya kaugalingon sa sulod sang taxi.
Gani, nag-untat ini sa pagmaneho kag gin-agaw ang armas kay Arroz sa diin naglupok ini apang maswerte nga naigo lamang ang bangko kag naglusot sa fuel tanker.
Gilayon nga naggwa si Medina sa taxi kag magapangayo kuntani sang bulig.
Apang, naggwa man ang biktima kag hinali na lang nga gintiro ang iya nga ulo nga gintunaan sang iya kamatayon.
Sa karun, ginahibalo pa sang mga otoridad kun diin ginkuha sang biktima ang armas nga iya gingamit sa pag-utas sang iya kabuhi.
