Yara na sa estable nga kondisyon ang tatlo ka nasamaran samtang duha naman ang napatay matapos makuryente sa Barangay Poblacion, Mabinay, Negros Oriental, kahapon, alas- 5:30 sang hapon.
Ang mga napatay ang ginkilala nga sanday Elnie Endencio, 31 anyos, Barangay Kagawad sang Brgy Arebasore; kag Jonel Tenebroso, 31 anyos, isa ka lift operator nga naka-detail sa Local Disaster Risk Reduction Management Office (LDRRMO).
Samtang ang mga nasamaran naman amo sanday Jay-ar Norbe, 33 anyos, Brgy Councilor sang Brgy Arebasore; Realyn Billares, 19 anyos, SK Chairwoman sang Barangay Banban; kag Kimjun Padasay, 30, Barangay Secretary sang Barangay Arebasore.
Sa interview sang Bombo Radyo Bacolod kay Negros Oriental Police Provincial Office Spokesperson Police Lt. Stephen Polinar, yara na sa estable nga kondisyon ang tatlo ka nasamaran kag wala man sang foul play bangod aksidente ang natabo.
Suno diri, gin-disasseble sang nmga biktima ang ila Christmas Tree Entry kag ginapangkakas ang Christmas lights gamit ang man lift truck.
Apang, nasagaid sang boom sang man lift truck ang livewire amo nga ngakalakuryente ang mga ini.
Ang nasambitan nga Christmas tree ang entry sang Brgy. Arebasore sa ginpatigayon nga Lingganay Festival kun sa diin ang isa sa highlights amo ang Christmas tree making contest sang kada Barangay sa banwa sang Mabinay.
