Ginklaro sang officer-in-charge District Engineer sang 5th Engineering District sang Negros Occidental nga wala gid sa ila records ang tatlo ka contractor gikan sa Northern Luzon nga ginapahayag may ghost project sa San Carlos City.
Sa interview sang Bombo Radyo Bacolod kag Engr Juan Alfonso Jorbina Sr., may existing flood control project na sa Jigalaman river, Palampas river kag Andoon river nga ginhimo sang mga local contractor sa Negros Occidental.
Paathag sini nga nagpadala sang sulat ang DPWH Central Office kay San Carlos City Mayor Renato Gustilo, agud kumpirmahon kun may natapos na nga proyekto ang tatlo ka unscrupulous contractors.
Ini bangod sa ila nga mga dokumento nga attached para sa tuyo nga pag-upgrade sang lisensya bilang construction firm, nalakip ang peke nga kontrata sa San Carlos City.
Aminado ini nga bisan sila ang nakibot sang ginnotify sang alkalde tuhoy sa ginapaverify sang DPWH Central Office bangod lain nga proyekto ang naga-eksister sa lugar.
Ginalantaw sini nga ginsakyan lamang sang tatlo ang mga existing flood control projects, gani lain ang project title, lain ang contractor kag lain ang project cost, apang parehas gid ang project location.
Suno diri, mahimo nga bangod tuman ka layo sang lokasyon sang proyekto, nagpinsar ang mga contractor nga indi na pag-iverify sang DPWH ang ila mga ginsumiter nga dokumento.
