Lunsay nagkalamatay ang tatlo ka mag-abyan nga nagasakay sa motorsiklo matapos magsampok sa Ceres bus sa Toboso, Negros Occidental kaina sang aga.
Suno sa hepe sang Toboso Police Station nga si Police Captain Joery Puerto, naagahan sa ilimnan sa town proper ang mag-abyan kag sa ila pagpauli antes ang alas-8:00 sang aga, may ginlagas sila nga kontra nga nagasakay man sa motorsiklo.
Pag-abot sa Curba Hagnaya sa Barangay Tabun-ac, nasugata sang mga ini ang Ceres bus nga padulong sa ciudad sang Bacolod.
Bangud kurbada ang dalan kag ginlamon sang motorsiklo ang lane sang bus, nagluntad ang head-on collision.
Dead-on-the spot kag nautod pa ang isa ka tiil sang driver sang motorsiklo nga si Junrey Bawaan, 19-anyos kag residente sang Barangay Bayawak, Escalante City.
Ang duha niya ka angkas ang gindala pa sa Vicente Gustilo District Hospital sa Escalante apang gindeklarar man nga dead-on-arrival.
Wala pa ginhingadlan ang duha ka mga biktima.
Suno kay Puerto, sa ulo ang kalabanan nga pilas sang mga biktima ilabi na nga lunsay wala sila sang helmet.
Sa karon, priso sa Toboso Police Station ang driver sang bus matapos nga magsungka sa otoridad.
