Antes pa man ginluthang-patay sang 8-anyos nga bata ang iya amay sa ciudad sang Sipalay, ginplanuhan na nila sang iya mga utod nga utdan ini sang liog kun nagakatulog.
Ini ang ginbuyagyan ni Punong Barangay Marlon “Bebing” Canillo sang Brgy. San Jose, nga amo karun ang nagaka-kustodiya sa 8-anyos.
Sa interview sang Bombo Radyo Bacolod, ginsaysay sini nga na-istorya na sini ang tatlo ka mag-ulutod kag diri nagtuad ang mga bata nga ginplanuhan nila nga utdan sang liog ang ila amay nga si Jessy Obas, 38-anyos sang Purok Manluy-a, Brgy. San Jose, kun ini ang nagakatulog apang wala nila ini gindayon bangud nagapamalabag ang ikaduha sini nga bata.
Apang, ang 8-anyos ang naghambal gid nga kun liwaton pa sang ila amay nga sakiton siya, patyon niya ini.
Dako ang pagpati ni Canillo nga tuman ang kaugot sang mga kabataan sa ila amay bangud sang pagpanakit sini sa ila.
Samtang, kahapon nakapauli na sa Sipalay ang asawa ni Obas nga si Corazon, 48-anyos gikan sa Manila kun sa diin ini nagatrabaho.
Sa pag-istorya sang punong baranggay diri, gin-ako sang asawa nga nakaagi man siya nga ginsakit sang biktima.
Indi naman mag-upod ang bata nga nakapatay sa iya iloy, rason nga si Canillo ang nagkustodiya diri.
Nahisayran nga ginpapili sang Department of Social Welfare and Development ang menor de edad, apang indi ini mag-upod sa iya iloy, kag kay Canillo siya luyag magpakustodiya.
Ginhatagan man sang pagtamod sang punong barangay sang Brgy. San Jose sa ciudad sang Sipalay nga indi maayo ang nangin epekto sang kilala nga TV series ni Coco Martin sa 8-anyos nga nagluthang-patay sa iya amay.
Sa interview sang Bombo Radyo kay Punong Barangay Marlon “Bebing” Canillo sang Brgy. San Jose, ginsaysay sini nga nagtuad sa iya ang 8-anyos nga masami ini nagalantaw sang “Ang Probinsyano” nga gina-bidahan ni Coco Martin.
Suno sa kapitan, posible nakatuon diri ang bata sa kun paano ang pagpangluthang bangud sang mga fight scenes sa teleserye.
Apang nahisayran man kay Canillo, nga mismo ang amay nga biktima ang nagtudlo sa mga kabataan sini kun paano ang pag-uyat kag pagpalupok sang armas.
Nakaagi nga nakawatan sang una si Jessy Obas, 38-anyos sang Purok Manluy-a, Brgy. San Jose, kag sang nakabakal ini sang paltik nga armas gintudluan niya ang iya mga bata nga mag-uyat sang armas agud sila na lang ang magatiro sa mga kawatan kun magbalik ang mga ini sa ila balay nga wala siya.
Suno kay Canillo, ginpakita pa sang bata kun paano niya ginluthang sang makatatlo ka beses ang iya amay.
Sa karun nga yara sa kustodiya sang kapitan ang menor de edad, naobserbaran sini nga nagakatulala ang 8-anyos kun wala ini gina-istorya.
