BACOLOD CITY – Tuman ang kasubo sang isa ka pamilya sa Calatrava, Negros Occidental matapos ginpatay sang magulang nga lalaki nga may problema sa paminsaron ang iya tatlo ka mga utod kaina sang hapon.
Sa interview sang Bombo Radyo Bacolod, ginpahayag ni Councilor Honeyboy Goc-ong nga kalakip sa mga napatay sanday Gregor, 1 ka tuig; Alejandroa,5-anyos; kag June Renz Melibo, 14-anyos, nga naga-puyo sa Sitio Capanoyan, Barangay Marcelo, Calatrava.
Suno sa panaysayon sang manghod nga babayi nga nakapalagyo, ang mga biktima ang gin-gulgulan sang li-og sang ila 16-anyos nga magulang nga si John Mark, ala-1:00 sang hapon.
Kutsilyo ang gingamit sang suspetsado sa pagpatay sa iya mga utod.
Natyempuhan nga wala sa ila balay ang mga ginikanan sang mga biktima sang matabo ang krimen bangud naga-obra ang mga ini.
Maswerte naman nga nakapalagyo ang babayi nila nga utod kag nakapangayo sang bulig sa ila mga tupad balay.
Sa inisyal nga impormasyon nga nakuha sang konsehal, naga-hingyo ang suspetsado nga ma-eskwela ini subong nga Hunyo apang bangud sa kapigaduhon, wala ini nakapa-enroll.
Ginapasuni man nga nagapanakit ini kun indi mahatag ang iya ginapangayo.
Sa subong, at large pa ang suspetsado.
