Tatlo ka mga purok sa Barangay 16, Bacolod City ang ginpaidalum sa lockdown matapos duha ka mga residente ang nagpositibo sa coronavirus disease.
Sa interview sang Bombo Radyo kay Punong Barangay Joseph Delos Santos, ginkompirmar sini nga ginpaidalom sa lockdown ang Purok Punay, Purok King Fisher B kag Purok Tulihaw matapos magpositibo sa COVID ang duha ka mga residente sang nasambit nga barangay.
Suno kay Delos Santos, gilayon nga nagpatigayon sang contact tracing ang mga opisyales kag nagakooperar kag handa man magpa-isolate ang siyam ka mga nacontact trace.
Ginkuhaan man sang swab test ang mga miyembro sang pamilya sang mga nagpositibo.
Wala naman sang problema sa ayuda suno sa iya bangud ginahatag man sang barangay ang tanan nga kinahanglanon sang 40 ka mga persona nga naapektuhan sang lockdown.
Suno diri, manageable man ang mga residente kag normal man ang sitwasyon sa ila lugar.
Nagapasalamat man ang punong barangay sa madasig nga tikang sang mga ahensya sang ciudad.
Nagpang-abiso man ini sa mga pumuluyo nga indi magkahangawa kag magsunod lang sa mga health protocols.
