Patay ang tatlo ka miyembro sang New People’s Army sa engkwentro batok sa 47th Infantry Battalion sang Philippine Army sa Prk Santol, Brgy Tampalon, Kabankalan City alas-4:00 kaina sang kaagahon, Marso 21.
Isa sa napatay ang squad leader sang South-Western Front (SWF) nga ginkilala nga si Joedil Balsimo alyas Junjun/Cairo.
Napatay man sa engkwentro ang mga NPA members nga sanday Ritchie Verano alyas Makoy/Akiro kag Milky Sampini alyas Gorting.
Sa interview sang Bombo Radyo kay Lt Col. Dennis Martinez, Commander sang 47th IB, ang tatlo ka mga napatay nga miyembro sang NPA ang involved sa pila ka mga atrocities sa Negros Occidental lakip na diri ang pagpanunog nga natabo sa Himamaylan City kag pagluthang-patay sa 74 anyos nga lola nga si Leonora Anguit kag sa 39 anyos nga si Renante Vedarte sa Brgy Tapi, Kabankalan City.
Suno kay Martinez, na-recover sa ila ang lima ka long firearms, kalakip ang isa ka R4 rifle kag duha ka M16 rifles nga may M203 grenade launchers
Dugang pa, ginabanta lima tubtob pito ka NPA members ang naengkwentro sang mga militar.
Wala naman sang may nasamaran sa bahin sang mga suldado.
Ginpasalamatan ni Martinez ang Alkalde sa ciudad sang Kabankalan kag ang mga pinuno sang mga Barangay bangud sa pagbulig kag pagkooperar agud mapabilin ang kalinong kag seguridad sa lugar.
