Maswerte nga nakaluwas ang tatlo ka mga persona sang gin-anod sang mabaskog nga ilig sang tubig sang nagtabok ang mga ini sa suba nga yara sa boundary sang Brgy. Mansilingan kag Alijis sa ciudad sang Bacolod kahapon sang hapon.
Sa impormasyon nga nakuha sang Bombo Radyo Bacolod, nagpaligo sa bubon nga yara sa tabok sang suba ang mga biktima nga sanday Melanie Palacios, ang bata sini nga menor de edad nga lalaki kag iya bayaw nga si Perly Palacios pasado alas-5:00 sang hapon.
Sang nagpauli na ang tatlo matapos paligo, hinali nga nagbaskog ang ilig sang tubig kag gin-anod ang mga ini, apang maswerte sila nga may lalaki nga ginkilala kay a certain Nonoy nga nagapatubog sang karbaw nga amo ang nagbulig sa ila.
Gindala ang mga biktima sa Corazon Locsin Montelibano Memorial Regional Hospital apang nangin out-patient lamang si Perly kag ang menor de-edad apang gin-obserbaran gid sang mga doktor si Melanie bangud nga nagabusong ini.
