Patay ang isa ka tatlo katuig nga bata nga lalaki matapos malumos sa swimming pool sang Hda. Paz, Brgy. Po-ok, Hinoba-an, Negros Occidental sang Setyembre 5, sang gab-i.
Ang biktima ang ginkilala kay alyas “Niel,” residente sang Brgy. Bacuyangan, Hinoba-an.
Sa interview sang Bombo Radyo Bacolod kay Police Major Eric Doronila, hepe sang Hinoba-an Municipal Police Station, ang biktima nag-attend sang birthday party upod ang iya tiya kag duha ka pakaisa sa isa ka resort nga may pool.
Suno kay Doronila, samtang nagapungko ang iya tiya sa kilid sang pool kag nagabantay sa iya, nalingat ini kag wala na makita ang bata, gani pinangita niya ini.
Makaligad sang pila ka minutos, may isa ka bata nga nagsinggit nga may nagakalumos nga bata.
Gilayon nga ginkuha sang tiya kag mga kaupod ang biktima kag ginhatagan sang initial resuscitative efforts.
Nagpangayo man sila sang bulig sa mga nagresponder kun sa diin gilayon man nga nagresponde ang Hinoba-an Municipal Police Station, upod ang 4th SOU Maritime Group, Philippine Coast Guard, kag Hinoba-an DRRMO kag ginhatagan pa firs-aide ang bata antes gindala sa Hinoba-an District Hospital.
Apang, pag-abot sa ospital, ang biktima gin-deklarar nga Dead on Arrival (DOA).
Nagapati man ang pamilya nga aksidente ang natabo kag wala sang foul play.
