Tatlo ka local officials kag isa ka sibilyan ang patay sa panibag-o na naman nga serye sang shooting incidents sa probinsya sang Negros Oriental.
Kaina sang kaagahon, ginpatay sa ila mismo balay ang anay alkalde sang Ayungon, pakaisa sini nga lalaki; kag konsehal kag punong barangay sa Canlaon City.
Suno sa Negros Oriental Police Provincial Office, sanday Canlaon City Councilor Ramon ‘Bobby’ Jalandoni kag Punong Barangay Ernesto Posadas sang Barangay Panubigan, Canlaon City ang ginsulod sang armado nga mga lalaki sa ila puluy-an, pasado alas-12:00 sang kaagahon.
Sanday Jalandoni kag Posadas ang pareho nga residente sang Brgy. Panubigan kag minutos lang ang antad sang pagpatay sa ila.
Ginguba ang kahoy nga pwertahan sa balay sang duha ka opisyal kag gintiro sila sang makapila ka beses nga nagresulta sa ila kamatayon.
Si Jalandoni nga ikaanom nga konsehal sang Canlaon City ang naigo sa natuo nga bahin sang iya lawas samtang si Posadas naman ang gintiro sa ulo.
Santo sa impormasyon, nagasuksok sang itom nga bayo kag bonnet ang mga suspetsado kag nagsakay sa van sa ila pagpalagyo.
May ginsulat man nga mga tinaga nga “MABUHAY ANG NPA” sa gate kag dingding sang balay sang duha ka opisyales.
Ginabanta alas-2:30 sang kaagahon, ginpatay naman si former Ayungon Mayor Edsel Enardecido sa ila nga balay sa Barangay Tampocon I.
Pwersa nga ginsulod sang armed men ang balay ni Enardecido kag gintiro ang 60-anyos nga anay opisyal sa sulod mismo sang iya kwarto.
Gintiro man sang mga suspetsado ang pakaisa sang anay alkalde nga si Leo Enardecido nga gilayon man nga napatay.
