Patay ang tatlo ka persona, samtang 15 naman ang pilason sa nagluntad nga shooting incident sa Brgy. Bagua 2, Cotabato City kagab-i, Setyembre 13, 2026, besperas sang Parliamentary Election sa Bangsamoro Autonomous Region in Muslim Mindanao.
Suno sa Cotabato City Police Office, ang pagtiruhay ang sa tunga sang armado nga mga kalalakinhan sa atubang lamang sang Datu Usman Mampen Elementary School.
Ginapahayag nga nagdis-uganay ang mga supporters sang magkasumpong nga United Bangsamoro Justice Party kag Bangsamoro Federalist Party bangod sa agaway sang linya.
Ini ang nagresulta sa tinapungulay, tubtob nga nagdangat sa pagtiniruhay.
Nahibaluan nga antes paman, nagwithdraw ang masobra 800 ka mga manunudlo sa pagserbe kuntani nga electoral board.
Suno kay COMELEC Chairman Atty. George Erwin Garcia, kalabanan sa mga nagwithdraw ang gikan sa Maguindanao del Sur.
Samtang 137 naman ang nagwithdraw sa Cotabato.
May-ara man sang nag-atras sa Lanao del Sur, Tawi-Tawi, kag Special Geographic Area (SGA).
Suno sa COMELEC, iban sa mga nagwithdraw ang bangod may mga himata ang mga ini nga nagpapili sa BARMM Elections.
Ginpasalig naman sang komisyon nga indi pasakaan sang kaso ang mga manunudlo, apang nagpahayag man ang COMELEC nga mas mayo kuntani kun mas timprano ang mga ini nagpahibalo nga maga-atras sa pagserbe nga electoral board.
May mga kapulisan naman nga nagpasalig nga sila ang handa nga magserbe bilang Special Electoral Board, bulos sa mga nabakante nga posisyon.
Ini agud maseguro nga mapadayun ang proseso sang pagboto sa mga polling precincts.
