Tatlo ka babayi ang kumpirmado nga napatay sa pagkalunod sa San Carlos City, Negros Occidental.
Una nga nareport ang pagkasapo sang bangkay sang babayi sa kilid sang baybayon sa Purok Galicia, Brgy 5, San Carlos City alas-6:21 sang hapon.
Ini ang gilayon man nga ginkilala sang pamilya, apang nag-ayo nga indi na lamang pag hingadlan.
Suno sa pamilya, samtang nagapangita sang mapasilungan bangod sa mabaskog nga hangin kag ulan dala sang Bagyo TINO, ini ang nakadanlog kag nahulog sa baybay.
Wala naman ini nakatakas sa tubig bangod sa tuman ka baskog nga current.
Wala naman sang foul play nga nakita sa kamatayon sang biktima.
Samtang nareport naman alas-6:49 ang pagkasapo sang duha ka bangkay sang babayi sa Maglunod river sa Sitio Lumampag, Brgy Quezon, San Carlos City.
Apang ginapahayag nga ala-1:30 pa lamang nakit-an ang bangkay kag late reported lamang.
Isa sa mga biktima ang ginkilala sang iya pamilya nga si Maricel Villaver, 45 anyos, kasado kag residente sa lugar.
Samtang ang isa ka biktima ang wala pa makilal-an.
Sa inisyal nga imbestigasyon, pagkalunod man ang ginalantaw nga rasun sang kamatayon sang duha.
