Patay ang tatlo ka persona matapos nga malumos sa Sitio Capaclan, Barangay Inayawan, banwa sang Cauayan, Negros Occidental sang Oktubre 11.
Sa interview sang Bombo Radyo Bacolod kay Petty Officer 1 Aiden Trabasas, sub-station commander sang Philippine Coast Guard Sub Station Cauayan, nakabaton sila sang tawag nagikan sa Barangay Kagawad nga may nalumos kag isa ka bata ang missing.
Suno kay Trabasas, gilayon sila nga nagtawag sa Cauayan Disaster Risk Reduction Management Office kag ginrespondehan ang insidente.
Una nga naglangoy ang anum katuig nga bata nga lalaki kag bangud sa mabaskog nga current sang tubig nagpangayo ini sang tabang.
Gintuyo sang 16 anyos nga babayi nga luwason ang anum ka tuig apang wala sini masarangan ang mabaskog nga balod.
Nakita man sang Lola ang natabo sa duha ka mga apo sini kag gintinguhaan nga masalbar ang duha apang bisan ini ang gin-anod man.
Suno kay Trabasas, gin-rescue sang mga residente ang 16 kag 61 anyos nga biktima apang ang anum ka bata ang ginpatigayunan sang search and retrieval operation.
Nasapwan ang bata sa mga bato matapos nga ini ang nakabunggo bangud sa mabaskog nga current.
Gindala pa ini sa malapit nga ospital apang gindeklarar nga patay na.
Ang duha pa ka biktima ang gindeklarar man nga dead on arrival sa ospital.
Panugyan ni Trabasas ilabi na sa nagapuyo malapit sa dagat nga kun malain ang tyempo indi na maglangoy ukon maglayag sa dagat agud malikawan ang insidente.
