Padayon nga ginadapatan sang pagbulong ang tatlo ka indibidwal nga nagasakay sa motorsiklo matapos nga nabungguan sang Isuzu hauler truck sa bahin sang Purok Bulaklak, Barangay Salong, Kabankalan City, Negros Occidental sang Lunes sang gab-i, October 26, 2026.
Ginkilala ang mga napilasan ang Nico Dumdum, lalaki, single, 16 anyos; Emeral Pahilagao, babayi, 16 anyos; Ana Loraine Pahilagao, babayi kag lunsay mga residente sang Sto. Manumbala, Barangay Camansi, Kabankalan City, Negros Occidental.
Samtang ang driver sang Isuzu hauler truck ang ginkilala kay Armando Manoyon kag residente sang Sto. Pacao, Bantayan, Kabankalan City, Negros Occidental
Sa inisyal nga imbestigasyon, antes ang insidente, nagabiyahe ang Vehicle 1 gikan sa transloading area sa Canlamay, Barangay Magballo, Kabankalan City, padulong sa URC SONEDCO agud magdiskarga sang kalamay.
Samtang ang motorsiklo ang nagabiyahe gikan sa puluy-an sang mga nagasakay padulong sa Sto. Bandihan agud nga magpahilot kay Emeral Pahilagao bangud ginapahayag nga nagalain ang iya pamatyag.
Pag-abot sa dululhugon nga bahin sang highway malapit sa sementeryo sa Barangay Salong, nagpreno ang driver sang V1 bangud sa dululhugon nga kondisyon sang dalan.
Apang, nag-malfunction ang braking system kag wala nag-untat ang salakyan.
Bangud sini nagmaniobra ini pakadto sa nawala nga bahin sang dalan rason nga nabungguan ang motorsiklo nga nagresulta sa pagkatumba sang motorsiklo sa dalan.
Bangud sa insidente, nag-angkon sang madamo nga pilas sa lawas ang driver kag ang duha ka pasahero sang motorsiklo.
Gilayon nga ginbuligan sang mga nagresponde nga personnel sang City Disaster Risk Reduction and Management Office (CDRRMO) ang mga napilasan nga indibidwal kag gindala sa Lorenzo D. Zayco District Hospital para sa medical attention.
