Naclaim na sang pamilya ang tatlo sa pito ka bangkay nga miyembro sang New People’s Army nga napatay sa engkwentro sa Purok Maghirupay, Brgy Tapi, ciudad sang Kabankalan, Negros Occidental, kahapon.
Ang mga napatay ang ginkilala nga sanday Jhonrey Mejares, alias “Jai/JR”, political instructor ukon political guide; Glendel Tinio Mejares, alias “Ayin”, isa ka medical officer; Charity Amacan, alias ” Cha/Leah”, isa ka Squad leader kag anay secretary sang South East Front, Reniel Locsin Cello, alias “Kumpol/Adie”, isa ka squad leader; kag si Mary Jane Maguilat, alias ” Shonie/Chinchin/Shedi”, vice squad leader kag asawa ni alyas Kumpol; Jhon Isidor Supelanas, alias “Dalia”, political instructor; kag amo si alias “Pitong”, medical officer.
Sa interview sang Bombo Radyo Bacolod kay Brig. Gen. Joey Escanillas, commander sang 302nd Infantry Brigade sang Philippine Army, naclaim na ang bangkay ni Charity Amacan, alias ” Cha/Leah” kag sang mag-asawa nga si Reniel Locsin Cello, alias “Kumpol/Adie” kag Mary Jane Magquilat, alias ” Shonie/Chinchin/Shedi”.
Suno diri, may isa ka nasalabat nga PWD nga sibilyan sa engkwentro nga amo ang amay sang pamilya nga nagapuyo sa balay nga gintiniran sang NPA.
Ginghostage sang NPA ang sibilyan kag naigo-an sang bala nga sa karun ipaidalum sa operasyon bangod wala nakagwa ang bala sa guya sini.
