Napasakaan na sang kaso nga destructive arson sang nagligad nga Lunes ang tatlo ka mga suspetsado nga ginatudlo nagtuga sang sunog sa Java Pension House sa corner Gonzaga-Locsin Streets, ciudad sang Bacolod kun sa diin anom ang patay.
Madumduman nga ang mga suspetsado nga sanday Rodolfo Inson alyas Onyok, 23-anyos sang Libertad Market, Barangay 40, Bacolod City; kag Venancio Valeriano alyas Noy Lumot, 27-anyos sang Purok Kalubihan, Barangay Amayco, Murcia ang nadakpan sa pagbuligay sang Bacolod Police Station 1 kag Murcia Municipal Police Station Biyernes sang aga samtang at large naman ang isa nila ka upod.
Sa interview sang Bombo Radyo Bacolod kay Bacolod City Fire Marshal Fire Chief Inspector Publio Ploteña, ginpahayag sini nga ginhingagaw nila file ang kaso antes pa man maglapse ang 36 ka oras nga reglementary period.
Ginkumpirmar man sini nga nakahunong sa gihapon ang duha sa Police Station 1 samtang ginapangita pa ang isa nila ka upod.
Dugang pa sang fire marshal nga ginatumod pa nila karon ang mga violation sang Java Pension House.
Samtang, nagpahanumdom naman ini sa mga luyag magkuha ukon magrenew sang business permit nga kumpletuhon ang mga requirements agud makakuha sang fire safety inspection certificate gikan sa BFP nga kinahanglan sa pagkuha sang nasambit nga permit.
