Ginpatpat ni Negros Occidental Governor Eugenio Jose “Bong” Lacson ang 3-Year Plan sang probinsya sa inaugural session sang Sangguniang Panlalawigan sa Capitol Social Hall kahapon sang hapon.
Sa seremonya nga ginpatigayon kahapon, ginpasalamatan ni Lacson ang mga board members kag si Vice Governor Jeffrey Ferrer sa pagsuporta sa mga resolusyon kag hingyo sang executive branch ilabi na sa tion sang pandemic paagi sa madasig nga pag-aprubar sang Sangguniang Panlalawigan.
Kahapon, may apat ka agenda sa nasambit nga seremonya nga ginalakipan sang paghatag sang otoridad kay Vice Governor Ferrer sa pag-aprubar kag pag-appoint sang chairmanship sa mga komitiba; pagpasar sang duha ka mga resolusyon nga nagare-appoint kay Atty. Rayfrando Diaz bilang Provincial Administrator kag Atty. Roberto Nillas bilang Provincial Legal Officer.
Ginreiterate man sang gobernador ang mga proyekto kag programa sang administrasyon kaangay man sang iya speech sa inagurasyon sini.
Nagpasalig kag nagpromisa naman si Vice Governor Jeffrey Ferrer nga magapadayon ang Sangguniang Panlalawigan sa pagsuporta sa mga plano kag programa sang executive department para sa kauswagan sang probinsya kag sa ikaayo sang mga pumuluyo.
Ginhangkat man sini ang mga board members nga mangin kabahin sa crucial nga mga desisyon agud ma-uphold kag mapromote ang welfare sang mga Negrosanon kag isustain ang collaborative kag purposeful nga direksyon sa tunga sang executive kag legislative department.
