Masobra isa ka milyon ka pesos nga balor sang ginapatihan shabu ang nakumpiskar sang mga otoridad nagikan sa isa ka iloy nga subject sang buybust operation sa Hacienda Zaragosa, Brgy. Don Jorge L. Araneta, Bago City, Negros Occidental kahapon.
Suno kay Police Lt. Glenn Soliman, team leader sang Regional Drug Enforcement Unit sang Police Regional Office 6 nga nagpatigayon sang operasyon kaupod ang iban nga unit sang PNP, 30-anyos pa lang ang subject nga ginkilala kay Sofia Marie Dela Cruz alyas Beauty apang isa na ini ka balo.
Ang operasyon ang ginpatigayon sa ila mismo nga balay sa Hacienda Zaragosa.
Si Dela Cruz ang nabaklan sang mga otoridad sang duha ka sachets sang suspected shabu nga nagabalor sang P30,000.
Sa ginpatigayon nga search incidental to lawful arrest nga ginsaksihan man sang mga barangay officials, narekober pa gid kay Dela Cruz ang dugang nga sachets sang suspected shabu kag nagdangat sa 150 gramos ang kabug-usan nga recoveries.
Ang 150 gramos sang shabu ang nagabalor sang P1,020,000.
Nakuhaan man si Dela Cruz sang isa ka para-ordnance caliber .45 pistol nga may pito ka mga bala.
Suno kay Soliman, subong nga adlaw ginpaidalom sa inquest proceedings si Dela Cruz sa kaso nga violation sang Republic Act 9165 ukon Comprehensive Dangerous Drugs Act of 2002.
Kaupod sang RDEU sa pagpatigayon sang operasyon ang Bago City Police Station, Anti-Illegal Drug team kag Criminal Investigation and Detection Group 6 sa koordinasyon man sang Philippine Drug Enforcement Agency Regional Office 6.
