30 ka mga stalls ang nahalitan sa sunog nga nagluntad sa sulod sang Bacolod Central Market pasado alas-2:00 kaina sang kaagahon.
Sa interview sang Bombo Radyo Bacolod kay Fire Superintendent Jenny Mae Masip, fire marshal sang Bureau of Fire Protection – Bacolod, nabatun nila ang tawag alas-2:50 kaina sang kaagahon.
Dako na ang kalayo sang ila maabtan kun sa diin apat tubtob lima na ka stalls ang nalamon sang kalayo.
Sa 30 ka stalls 18 ang totally damaged samtang 12 naman ang partially damages samtang 16 ka tenants naman ang apektado bangod ang iban ang may double nga stalls.
Kalakip sa mga stalls nga nasunog ang tailoring shop, karenderia, jewelry store, sari-sari store kag may-ara man sang nagabaligya sang native products.
Nakontrolar ang kalayo alas-3:10 kag natigayon nga mapalong alas-3:20 sang kaagahon.
Sa karun padayun pa nga gina-imbestigaran ang rasun sang sunog.
Ang sunog ang nagdangat sa 2nd alarm kag may ginabanta kahalitan nga nagadangat sa P4,752,000.
Gilayon man nga nagpadulong sa area si Bacolod City Administrator Dr. Lucille Gelvolea agud tsekyaron ang sitwasyon.
Temporaryo naman nga wala ginpasulod bisan ang mga tenants samtang wala pa mabalikan sang BFP-Bacolod bangod madulom pa sang natabo ang sunog, kag luyag nila nga maseguro ang safety.
Suno kay Gelvolea, siya ang naga-upod sa kasubo sang mga tenant nga nahalitan kag tinguhaan nila nga makabalik gilayon ang mga stalls nga nakaangkon lamang sang partial damage.
Nakabatun man ini sang impormasyon nga may tawo nga nagatulog sa tailoring shop, nga nahimo man nga makagwa sang mag-umpisa ang kalayo.
Ini ang ila pa nga tsekyaron bangod ginadumilian ang pagtulog sa sulod sang merkado pag natapos na ang operating hours.
