Ginkompirmar sang Executive Assistant to the Mayor sa syudad sang Bacolod nga may ginkompiskar nga expired nga karne ang Task Force Botagoy sa Barangay Mansilingan, Bacolod City sang damlag lang.
Sa interview sang Bombo Radyo Bacolod kay Ernie Pineda, nakabutang sa freezer ang kapin 300 kilos nga karne ang ginkompiskar sang Task Force matapos nga madetect nila ini nga nagexpired na sadtong Setyembre 20,2020 pa.
Suno kay Pineda, ginpahayag man sang mga nagabaligya sang karne nga wala na nila ginadisplay ini apang ginconfiscate na nila kag ginlubong.
Suno sa iya dapat ginawithdraw na sang mga manufacturing company antes pa ang expiration date sang karne ukon himuan sang paagi agud nga madispose.
Suno diri ang mga karne nga gin-ihaw sang slaughter nga single A ang para lamang sa local consumption samtang ang mga karne nga gin-ihaw sang double A nga slaughter kaangay sa Bacolod ang sarang nga mabaligya sa mga lugar nga sagwa sang syudad kag ang Triple A naman nga slaughter house ang karne nga gin-ihaw diri ang sarang nga maexport sa sagwa sang pungsod.
Suno pa kay Pineda ang mga karne ang dapat maagi sa slaughter house agud nga mainspection maayu kag makita kun may diperensya ang karne ukon wala kag maisyuhan sang meat inspection certificate antes ibaligya.
Duha ang ginaagyan nga proseso sang karne ini ang Anti mortem examination ukon ang inspection antes ihawon kag post mortem inspection antes ibaligya ang karne.
Suno kay Pineda ang kutob nga makita nga wala nakapasar sa inspection ginakuha nila ini kag ginabubuan sang chemical antes ilubong agud indi na pagkutkotun kag lutuon para makaon.
