Amat-amat na sa karun nga ginapagaling ang 30,000 ka sako sang humay nga yara sa duha ka warehouses sang National Food Authority sa probinsya sang Negros Occidental.
Sa interview sang Bombo Radyo Bacolod kay Benilda Fidel, branch manager sang National Food Authority – Negros Occidental, puno ang duha nila ka warehouse sa Bacolod City kag Barangay Dancalan, Kabankalan City.
Sa karun 90 porsyento sang unod sang warehouse ang humay samtang bugas na ang 10 porsyento.
Madumduman nga sa pagdeklarar sang National Food Emergency for Rice, ang NFA ang may mandato sa pagbakal sa mga local rice farmers kag ini ang ibaligya sa barato nga presyo sa mga local government units, nga amo ang magapanaog sa ila mga constituents.
Suno kay Fidel, ginsuguran na nila subong nga adlaw ang pagpagaling sang mga humay sa mga private rice millers.
Ini agud kun mabuhinan na ang load sa warehouse, sila ang makapasulod sang panibag-o.
Magluwas sa mga idistribute sa mga LGUs, ginapasalig sini nga may mga bugas gihapon para sa calamity purposes kaangay sang mga nasunugan kag iban pa nga kalamidad.
Suno kay Fidel, P38 ang presyo sang kada kilo, kag pasalig sini nga ang ipanagtag sa mga LGUs ang bag-o galing nga mga bugas.
Sa karun, ginabisitahan nila ang mga alkalde sang tagsa ka banwa kag ciudad kag nagalaom ini nga tanan ang magapartisipar sa programa agud mapanubo man ang presyo sang bugas.
