Nagpalab-ot sang pagpakig-unong ang 303rd Infantry Brigade sang Philippine Army sa pamilya sang mga nagtaliwan nga militar sa paghugpaas sang C-130 cargo plane sang Philippine Air Force sa Patikul, Sulu kahapon sang hapon.
Madumduman nga nagdangat na sa 45 ang patay samtang 53 ang pilason gikan sa natabo nga plane crash.
Sa 45 nga napatay, tatlo naman diri ang mga sibilyan nga nagapuyo sa lugar nga gintup-an sang eroplano.
Suno kay Brigadier General Inocencio Pasaporte, commander sang 303rd Infantry Brigade masubo nga adlaw para sa Armed Forces of the Philippines (AFP) ang natabo nga trahedya.
Pangabay naman sini nga magdasig pa ang pag-ayo sang mga nasamaran nga mga indibidwal.
Ginakasubo naman ini ni Pasaporte ilabi na nga ang Philippine Air force ang nagasuporta man sa Philippine Army kag sa bilog nga AFP.
Ginpakigbahin man sini nga kadamuan sa mga napatay ang mga personnel sa Philippine Army nga ginreassign sa Infantry Division sa bahin sang Sulu.
Samtang wala paman sang impormasyon si Pasaporte kun may nakabahin sa aksidente nga gikan sa Western Visayas partikular na sa Negros Occidental.
Sa karun wala paman nakapagwa sang mga pangalan ang Philippine Army.
Suno kay Pasaporte, nakita sini sa mga litrato nga wala nakaseatbelt ang mga suldado.
Samtang ginpakigbahin man sini nga may separado nga training ang mga militar para sa emergency landing.
Samtang nagapati naman si Pasaporte nga nakahugpa na sa Bacolod-Silay Airport sadto ang C-130 Cargo Plane nga may tail number nga 5125.
Nagapati ini nga gingamit na ini sadto sa pagdeliver sang supply para sa AFP sa probinsya.
