Nagpanindugan ang pinuno sang 303rd Infantry Brigade nga ang mga operasyon sang militar ang lunsay legitimate indi kaangay sa ginpahayag sang New People’s Army (NPA).
Sa interview sang Bombo Radyo Bacolod kay Brigadier General Inocencio Pasaporte, ginpahayag sini nga masami nila nga ginabasehan ang report sang tropa sa field.
Suno kay Pasaporte, ginpamangkot sini sang matuod nga nagakatabo sa field ang mga napilasan nga katapo sang tropa sang Philippine Army sa nagluntad nga engkwentro sa syudad sang Silay sang tinalikdan nga tuig kag nakompirmar sini nga legitimate ang natabo nga operasyon.
Madumduman nga sang Agosto 20, 2021 napatay ang Amazona ukon ang female fighter sang New People’s Army (NPA) nga ginkilala kay Kerima Lorena Tariman alyas Ka Ella ukon Em-Em, 42 anyos kag tumandok sa Legaspi City, Albay, sa nangin engkwentro sa militar sa Barangay Kapitan Ramon, Silay City.
Nakuha man sa encounter site ang mga extortion letters nga ginagamit sang mga ini sa pagpangilkil sa mga tag-iya sang duta kag mga negosyante.
Samtang suno sa pinuno sang 303rd Infantry Brigade, indi man matago sang NPA nga sila ang may kahimuan sa pagpang-ambush sa katapo sang mga kapulisan sang Binalbagan Municipal Police Station.
Suno kay Pasaporte front lamang sang NPA ang pagpahayag sa ila ginpagwa nga statement nga sabat sang grupo sa Philippine National Police (PNP) nga gingamit sang administrasyon ni Duterte sa counter-insurgency operations.
Kasubong man panindugan sang NPA nga ang Joint Enhanced Military Operations (JEMPO) kag focused military operation (FMO) ang nagatublag sa kinamatarong kag malinong nga pagpangabuhi sang mga mamumugon kag indigeneous people sa nabukid nga bahin sang Central Negros.
Nagpanindugan si Pasaporte nga tanan nga mga operasyon sang tropa sang gobyerno ang legitimate.
Ginpahayag man sini nga nagapadayon man ang operasyon sang militar kag PNP batok sa insurhensya.
Nagpanugyan man ini sa mga pumuluyo nga pilion ang mga ginaupdan.
