Liwat nga napreso ang 31 anyos nga lalaki matapos nga nangawat sang armas-luthang sa security guard sa Purok Lilang, Brgy Banago, ciudad sang Bacolod, kahapon, alas- 4:32 sang hapon.
Sa interview sang Bombo Radyo Bacolod kay Police Captain Rondyl Tapang, station commander sang Bacolod Police Station 3, ginbilin sang security ang armas sini sa payag nga ila ginatiniran kag naglibot sa area nga iya ginabantayan, apang ginsulod sang kawatan nga si Alyas Buyong, residente sang Brgy Banago ang payag kag gintaban ang isa ka 9mm pistol.
Suno diri, ginreport sa ila ang natabo kag gilayon nila nga ginpangita si Alyas Buyong sa bulig man sang mga residente nga nakakita kun diin ini nalagyo.
Nadakpan ang suspek kag narekober ang armas apang nakuhaan man ini sang kapin sa duha ka gramo sang suspected shabu nga may standard drug price nga P13,600.
Liwat na naman nga ginpreso si Alyas Buyong bangod sang tuig 2009 siya ang napreso man sa kaso nga murder.
