Pilason ang isa ka lalaki matapos ginlabo sa Purok Kahirup B, Brgy. Mansilingan, Bacolod City sang Pebrero 21, 2026 sang gab-i.
Ginkilala ang biktima nga si alyas Jonel, 31 anyos kag ang suspek ang ginkilala kay alyas Amed, 29 anyos, lalaki, single kag lunsay mga residente sang Purok Kahirup B, Brgy. Mansilingan, Bacolod City.
Sa interview sang Bombo Radyo Bacolod kay Police Captain Jay-R Reyes, station commander sang Bacolod Police Station 7, santo sa imbestigasyon sang mga kapulisan ang biktima ang nagsag-ob sang tubig kag wala sang madamo nga estorya ginlabo ini sang suspect gamit ang plamingko.
Suno kay Reyes, nakaagom sang pilas sa nagkalainlain nga bahin sang lawas ang biktima, kag yara na ini sa maayo nga kahimtangan matapos nga madapatan sang first aid sang nagresponde nga medical responder.
Nakahunong na ang suspek sa Bacolod Police Station 7 kag napreparar naman ang mga dokumento inkaso nga magpasaka sang kaso ang pamilya sang biktima batok sa suspetsado.
Nagpadulong man ang iloy sang suspect sa police station agud nga magpresentar sang medical certificate nga nadiagnose ini sang Schizophrenia.
