Balik prisuhan ang isa ka 31-anyos nga lalaki bangud sa pagbaligya sang illegal nga mga armas luthang.
Sa interview sang Bombo Radyo kay Criminal Investigation and Detection Group (CIDG) Negros Occidental Head Lt. Col. Roldan Daniel, nagpatigayon sila sang joint gun buybust operation kaupod ang Talisay City Police Station sa Barangay Matab-ang, Talisay City kun sa diin nadakpan si Peter Sitjar Jr., 31 anyos kag residente sang Barangay Zone 4-A, sa nasambit nga ciudad.
Nakuha sa iya paghinakop ang isa ka calibre .45 pistol, isa ka magazine kag 11 ka mga live ammunition.
Suno kay Daniel, una na ini nga napriso bangud man sa kaangay nga kaso.
Sa karun ila pa ginalantaw ang iya nga background apang sa inisyal nga impormasyon, may yara ini sang grupo nga naga-operate sang illegal nga buluhaton sa probinsya.
Sa karun yara si Sitjar sa kustodiya sang CIDG kag natalana nga pasakaan sang kaso nga paglapas sa R.A. 10591 ukon Comprehensive Firearms and Ammunition Regulation Act.
