31 ka mga baboy ang ginpatay sa Purok Kabalagnan, Barangay Tangub, ciudad sang Bacolod matapos nagpositibo sa African Swine Fever ang mga baboy diri, kasunod sang confirmatory test.
Sa interview sang Bombo Radyo kay Punong Barangay Noli Villarosa, tatlo ka nayon, lima ka nagabusong pa lamang kag 23 ka idik ang ginpatay agud indi na maglapta pa ang nasambit nga balatian.
Suno diri, ginbakal na lang gid sang barangay ang 31 ka mga baboy kag ginpapatay.
Ginbakal sang barangay ang nayon sa balor nga P10,000 kada isa kag P2,500 naman sa 23 ka idik, sa kabug-usan nga balor nga P107,500.
Nagapati naman ini nga nangin carrier sang sakit ang tag-iya mismo, matapos nga nagkalamatay ang tanan sini nga ginasagod nga baboy sa San Enrique kag ini ang nagbalik sa Bacolod dala-dala ang nasambit nga sakit.
Madumuman nga sang tinalikdan nga semana, ginhungod patay ang 35 ka mga idik sa Purok Paghidaet sa Barangay Tangub nga nagbalor sang P105,000.00.
