31 ka mga pulis nga assigned sa Western Visayas ang nadismiss sa serbisyo bangud sa nagkalain-lain nga grave offenses humalin sang Hunyo 2019 tubtob Abril 2020.
Suno kay P/Lt. Col. Gilbert Gorero, spokesperson sang Police Regional Office 6, ang 31 ang kabahin sang 152 ka mga pulis nga ginkasuhan, naproseso kag naimbestigaran paagi sa summary hearing procedure.
Nagikan naman ini sa kabug-usan nga 190 ka personnel nga ginalakipan sang 181 ka non-commissioned officers kag 9 ka mga commissioned officers sang mga kapulisan sa Region 6.
Sa 190 nga mga personnel, 31 diri ang nadismiss sa serbisyo nga lunsay mga non-commissioned officer, tatlo naman ang nademote, isa diri ang opisyal, samtang non-commissioned officer naman ang nabilin.
Samtang 114 naman ang nasuspend depende sa nangin kaso nga yara sa 15 ka adlaw ukon isa tubtob 3 ka bulan, 113 diri ang non-commissioned officer kag isa ang opisyal.
Samtang 5 naman ang ginforfeit ang sweldo, apang ginapahanugutan gihapon sa pagtrabaho nga lunsay mga non-commission officer.
Apat naman ang nareprimand kag isa diri ang opisyal samtang tatlo naman ang non-commissioned officer, ginpasakaan ini sang kaso nga administratibo kag ginpasa naman sa iban nga ahensya bangod wala na ini sa ila nga jurisdiction.
20 naman ka mga katapo sang PRO 6 ang nadismiss angkaso.
Suno diri, ginapangunahan ni Regional Director Brig. Gen. Rene Pamusmusan ang ginapatigayon nga internal cleansing sa mga kapulisan sa western visayas.
Samtang may-ara naman sang 3 ka nagapanguna nga programa ang PRO 6 kag isa na diri ang internal cleansing.
Ginaklaro naman ni Gorero nga wala ang mga ini ginakulang sa pagpahanumdom sa mga katapo, kag sa pagdayaw sa nangin serbisyo.
Apang ginatugyan naman sini nga ang mga kapulisan nga nagahimo sang indi matarung nga pwede ini nga magresign nalang kag magbalik sa pagkasibilyan.
Apang kun magapadayun ini, indi gid magduha-duha nga kakasun ini sa serbisyo.
Ginklaro man ni Gorero nga luyag sang mga ini nga makita ang integridad kag dignidad sa hanay sang kapulisan.
