Patay ang isa ka lalaki matapos nga gintiro sang duha ka mga wala makilal-an nga mga suspetsado sa Sitio Hills Cebuanohan, Purok 16, Barangay Inayawan, banwa sang Cauayan, Negros Occidental sang Hunyo 9, 2024.
Ginkilala ang biktima kay Ryan Monte, 32 anyos kag residente sang nasambit nga lugar samtang ang duha ka mga suspetsado ang nagapabilin nga at-large.
Sa interview sang Bombo Radyo Bacolod kay Police Lt. Col. Gary Allan Resuma, hepe sang Cauayan Municipal Police Station, natabo ang insidente pasado alas 11:00 ang takna sa gab-i kag ginpahibalo lamang sang punong barangay sang Barangay Inayawan sang shooting incident.
Suno kay Resuma samtang yara sa sulod balay sini ang biktima nagsulod ang mga duha ka mga suspetsado kag gintiro ini.
Suno diri, ginalantaw nga motibo sa pagpatay sa biktima amo ang daan nga hiligut-anon.
Suno sa hepe wala pa madakpan ang mga suspek samtang kaso naman nga murder ang ipasaka sa batok sa mga ini.
