32 tanan ka notice to vacate ang gin-issue sang Bacolod City Legal Office sa 32 ka mga balay nga nagatungtong sa pangpang sang Mambulok Creek sa Barangay 2, Bacolod City
Una nga ginpahayag nga 33 ka mga pamilya ang gindagdagan sang notice to vacate kag wala pa nakaproseso sang application sa Bacolod Housing Authority apang sa final nga listahan sang City Legal Office sang Bacolod, 32 lang ang gin-issue.
Suno kay Bacolod City Administrator Atty. Pacifico Maghari III, ginhatagan ang mga informal settlers sang notice to vacate kun sa diin ang mga ini ang boluntaryo nga magaguba sang ila nga structures ukon balay kag ginhatagan man sila sang 30 ka adlaw agud nga magproseso sang mga dokyumento sa Bacolod Housing Authority agud nga ma-awardan sang ila nga relocation sa Purok Arao, Barangay Vista Alegre syudad sang Bacolod.
Samtang ang walo naman ka pamilya nga nauna na nga nahatagan sang cash assistance ang ginhatagan nalang sang asta sa Domingo nga makasaylo sa Purok Arao kag amat-amat naman nga nagpangguba sang ila structures agud makasaylo na sa relocation site.
Ang 32 ka pamilya ang dapat man mangguba na sang ila illegal structures bangud kun indi, ang syudad na mismo ang mademolish sang ila mga balay.
