Kun ang tawo maigo sang pana ni Kupido amay tion nga daw indi na insakto ang ginahimo, kaangay lamang sang isa ka 33 anyos nga babayi sa Pinhalzinho, Brazil nga madasig nga ginpiyestahan sa social media.
Ini matapos nga gin-ako sini nga masami siya nagakadto sa mga lubong sa ila komunidad sa sulod sang masobra duha ka tuig agud lamang masapakan sang isa ka undertaker.
Ano bala ang undertaker? Amo ina sila ang mga tawo nga nagaasikaso sang mga patay, halin sa pag-embalsamar tubtob sa preparasyon sang haya kag lubong.
Sa isa ka interview, ginpakigbahin ni Daniela nga una sini nakita si undertaker nga kilala nga si Apollo sadtong 2023 sa lubong sang iya himata.
Humalin sadto luyag na sini masamin nga makita ang sultero nga undertaker.
Bangud nga wala ini nakahibalo kun ano ang himuon agud makapalapit sa sultero sa tion sang ikatatlo nga bulan ginahungod ni Daniela nga magtambong sa nagkalain-lain nga lubong sa ila nga pungsod.
Suno sa iya, wala man siya mahalata bangud kilalahay man ang mga tawo didto kag nakaandan na ang pagkumpanyar agud nga magpakig-unong.
Apang sa pihak sang iya pagpaninguha, wala siya gilayon matalupangdan ni Apollo nga masako man sa iya nga trabaho.
Kasubong man, wala nadulaan sang paglaom si Daniela tubtob nga sa ulihi naghumok man ang balatyagon sang undertaker tubtob nga nag-abot sa punto nga nag-umpisa na sila nga mag-estoryahanay tubtob sa nangin opisyal sila nga magkahagugma.
Sa ulihi gindihon na nila nga duha ang ila nga kasal kun sa diin nakibot ang ila nga mga bisita matapos nga nag-abot sila sa venue nga sakay sa isa ka karo sang patay bilang simbolo sang umpisa sang ila nga pagpalanggaanay.
