Nasapwan nga wala na sang kabuhi ang 33 anyos nga lalaki nga nasunog sa sulod sang kwarto sa Purok Villa Villeta, Brgy Estefania, Bacolod City, kahapon alas-7:00 sang aga.
Sa interview sang Bombo Radyo Bacolod kay Police Major Elmer Bonilla, Station Commander sang Bacolod Police Station 4, nakit-an pa sang bata sang biktima ang iya amay nga si Antonio Ausente Jr, alas- 11:00 sang gab-i sang Miyerkules nga nagsulod sa kwarto.
Apang, pagkasunod nga adlaw nakapanimaho ang tiya sang biktima sang nagakasunog nga karne kag pagsulod sini sa kwarto didto na sini nakita ang bangkay ni Ausente nga sunog ang bahin sang iya abaga tubtob sa iya nawong.
Suno kay Bonilla, santo sa pahayag sang bata ni Ausente, masami nga nagakuti sang guba nga appliances kag mga electric wires ang iya amay amo nga ginapatihan nga nasunog ini matapos nga may ginkuti nga gadget.
