Wala na sang kabuhi sang nasapwan ang isa ka 33 anyos nga lalaki samtang nagabitay sa 22 metros nga puno sang lubi sa Brgy. Sum-ag, Bacolod City kagab-i.
Sa interview sang Bombo Radyo Bacolod kay Police Lt. Jonito Pastrana, station commander sang Bacolod City Police Station 9, ginpahayag sini nga may pagbinaisay nga nagluntad sa tunga sang mag-asawa bangud sa bisyo sini nga magluwas sa pag-inom, nagagamit man ini sang ginadumilian nga druga.
Antes naggwa ang lalaki sa balay, nanglampus pa ini sang mga gamit kag ginlauman nalang sang asawa sini nga sa payag ini nagtulog.
Ang asawa naman sini ang una nakakita sa iya bana nga nagabitay sa lubi.
Suno kay Pastrana, ang biktima ang anay subject sa Oplan Tokhang kun sa diin nagsungka ini.
Isa ka trisikad driver ang biktima.
Sa karun, padayon pa ang pagproseso sang Scene of the Crime Operatives (SOCO) sa bangkay agud mahibaluan kun may yara sang foul play nga natabo nga paghikog sang biktima.
