86 ang panibag-o nga nagdugang sa kaso sang COVID-19 sa probinsya sang Negros Occidental kahapon samtang 69 naman ang nagdugang nga kaso sa syudad sang Bacolod.
Sa COVID-19 Regional Case Bulletin No. 424 nga ginpagwa sang Department of Health Center for Health Development-Western Visayas, nadugangan sang 331 ang kaso sa Region 6.
Sa nasambit nga numero 10 diri ang nagikan sa Aklan; 19 sa Antique; 59 sa Capiz; lima sa Guimaras; 36 sa Iloilo; 86 sa Negros Occidental; 69 sa Bacolod City kag 47 ang nadugang sa Iloilo City.
Bangud diri, nagdangat na sa 43,940 ang kabug-usan nga kaso sang COVID-19 sa Western Visayas kun sa diin nadugangan sang 569 ang mga nag-alayo sa balatian gani yara na ang kabug-usan nga recoveries sa 36,971 samtang nagdangat naman sa 1,074 ang death toll matapos madugangan sang 19 ka mga nagtaliwan bangod sa virus.
82 sa mga nadugang nga kaso sa probinsya sang Negros Occidental ang lokal cases kag apat naman ang locally stranded individual (LSI).
Samtang 68 naman sa mga panibag-o nga kaso sang COVID-19 sa Bacolod City ang Local Cases kag isa ang LSI.
Nagdangat na sa 9,040 ang kabug-usan nga kaso sang COVID-19 sa Bacolod kun sa diin 1,109 ang aktibo; 7,685 ang nag-alayo kag nagdangat na sa 245 ang nagtaliwan.
Samtang yara naman sa 14,274 ang kabug-usan nga kaso sang COVID-19 sa Negros Occidental kun sa diin 1,660 ang aktibo; 12,335 ang nag-alayo kag nagdangat na sa 272 ang death toll.
