19 porsyento ukon kabug-usan nga 338 nagikan sa masobra duha ka libo nga ginpagwa nga resulta gikan sa ginpatigayon nga mass testing sa ciudad sang Bacolod ang nagpositibo sa COVID-19.
Suno kay Bacolod City Vice Mayor El Cid Familiaran, chairman sang Inter-Agency Task Force (IATF) sa ciudad, kun pagabasehan ang pagsaka sang cases sa ciudad, sarang na nga masiling nga sa napulo ka persona nga makasalamuha, duha ang posible nga positibo sa COVID-19.
Santo sa statistic record, ang kataason sang pagsaka sang kaso sang COVID-19 sa ciudad sa bulan sang Agosto ang nagdangat na sa 19.2%.
Ginpaathag sini nga ang ginpatigayon nga mass testing ang random lang bangod indi mga kabahin sa contact tracing ang mga gintest.
Dugang pa sini nga ang mga subject sa contact tracing ang personal nga ginakadtuan sa puluy-an kag ginatest, apang wala ang mga ini ginpakadto sa mga mass testing sites.
Pahayag pa ni Familiaran nga kun 19 porsyento sang mga nagpaidalom sa mass testing ang pagabasehan, sarang nga magdangat sa 760 ang mangin positibo gikan sa masobra 4,300 nga nakigbahin sa programa.
Angot sa madasig nga pagtaas sang kaso sang COVID-19 sa Bacolod, nagsulat naman si Bacolod City Mayor Leonardo “Bing” Leonardia sa National IATF sa pagpamatok natuhoy sa pahayag nga indi na kinahanglan nga magpaidalum ang mga returning overseas Filipinos kag locally stranded individuals (LSIs) sa RT-PCR test kun nagnegatibo na ini sa test gikan sa Metro Manila.
Ginpaathag ni Familiaran nga luyag man sang alkalde nga papulion ang mga pumuluyo apang ginakunsiderar sini ang kahilwayan sang kabug-usan sa ciudad.
