Patay ang 34-anyos nga mangunguma matapos ginbuno sang bana sang iya live-in partner sa Purok 4, Barangay Caliling, banwa sang Cauayan alas-5:40 sang Dominggo sang hapon.
Ginkilala ang biktima nga si alyas “Toto”, single nga residente sang Sitio Polo, Barangay Masaling, Cauayan.
Samtang, ang suspect ang ginkilala nga si alyas “Alner”, 40-anyos, lalaki, kasado, helper kag residente sang Sitio Capaclan, Barangay Inayawan sa nasambit nga banwa.
Sa inisyal nga impormasyon, nagpondo si alyas “Toto” kag ang iya live-in partner sa isa ka tindahan agud magpagasolina sang ila salakyan sang hinali lang nga nagpalapit ang suspect kag ginbuno ang biktima gamit ang kutsilyo sa nagkalain-lain nga bahin sang iya lawas nga nagresulta sang iya kamatayon.
Gintinguhaan pa sang iya nobya nga magpatunga kag punggan ang suspect.
Matapos sini, ginhaboy ni alyas “Alner” ang kutsilyo kag gilayon nga nagpalagyo.
Nagpatigayon sang hot pursuit operation ang Cauayan Municipal Police Station sa pagdakop sang suspect.
