Ginkumpirmar sang District Jail Warden sang Bureau of Jail Management-Handumanan nga nagdangat sa 341 ka mga bata sang persons deprived of liberty ang nakabaton sang pamaskwa nagikan sa Office of the Vice President.
Sa interview sang Bombo Radyo Bacolod kay Jail Superitendent Abner Zamora, ang nasambit nga programa ang sugpon sang programa man sang opisina sang bise presidente sadto sang nagpanghatag siya sang gift packs sang nagbisita sa BJMP-Handumanan.
Suno kay Zamora, nagpangako sadto ang opisina sang bise presidente nga buligan man ang pamilya sang PDL gani sa karun ang mga kabataan sang mga priso ang ginhatagan sang mga bags kag mga school supplies.
Suno sa Jail Warden, ang nasambit nga aktibidad nga ginpatigayon sa BJMP-Handumanan, ang isa ka pilot testing agud lantawon kun may impact ini sa mga kabataan ukon wala, kag kun makita nga may impact ini ang ipatuman na nationwide.
Ginkalipay naman sang pamunuan sang BJMP-Handumanan nga bangud sa ila maayo nga pagmanage sang jail facility sila ang napilian nga patigayunan sang aktibidad sang bise presidente.
Tuman ang pagpasalamat sang mga iloy sang mga kabataan bangud sa nabaton .
Sa madason nga tuig, ang mga asawa naman sang mga PDL ang may batunon nagikan sa opisina sang bise presidente.
