BACOLOD CITY-Nagtipon ang pila ka grupo sa rebulto ni Former Senator Benigno (Ninoy) Aquino Jr. sa Dalan Araneta sa ciudad sang Bacolod bilang komemorasyon sang 34th anniversary sang EDSA People Power Revolution.
Kalakip sa mga grupo nga nagpatigayon sang programa sa lugar amo ang Samahan sa Tuwid na Daan Laban sa Katiwalian; LP; Paghimud-os Negros kag Federation of Urban Poor in Negros Occidental sa pagpamuno sang ila Provincial Coordinator nga si Joy Arabelo.
Sa interview kay Jarabelo, ginpahayag sini nga bisan diutay lang sila nga nagtipon agud dumdumon ang ginbansagan “bloodless revolt” subong, gin-insister nila nga dapat iselabrar ang ini nga adlaw bangud importante ini sa maragtas sang Pilipinas.
Ang subong nga komemorasyon ang may tema nga “Ipanumbalik ang Dungog kag Dignidad sa Pumuluyong Pilipino nga gintuga sang EDSA People Power”.
Kadungan sini ang ila pagpamatok sa mga tikang agud nga gub-on ang kun ano ang matarong kag tuyo nga dulaon sa maragtas sang pungsod ang People Power revolution.
Nagawangal man ang grupo batok sa ginahimo nga repression ukon pagpahipos sa media.
Samtang nagapanugyan si Jarabelo sa mga kabataan nga magbasa kag tukibon ang natabo sang 1986 revolution kun sa diin naghugpong ang pumuluyo lakip na ang simbahan kag nagtindog batok sa 20-anyos nga pagpungko ni Marcos sa pwesto.
Suno kay Jarabelo, kun wala ang People Power Revolution, wala sang kahilwayan nga gina-enjoy ang mga pamatan-on sa karun.
