Dead on arrival ang isa ka 35-anyos nga lalaki matapos ginlabo sang iya nga manghod sa ciudad sang Kabankalan kahapon sang kaagahon.
Sa interview sang Bombo Radyo kay Police Lt. John Paul Tabujara, deputy station commander sang Kabankalan City Police Station, ginhagad ni Jolan Su-an, 35 anyos kag residente sang Purok Santol, Brgy. Tampalon, sa nasambit nga ciudad, ang iya nga manghod nga si Joven Su-an, 25 anyos, nga mag-inom.
Suno kay Tabujara, may nagluntad nga paglalisanay sa tunga sang mag-utod kag ginhaboy ni Jolan sang bato si Joven, rason kun ngaa naimpito ini kag hinali lang nga nagkuha sang bolo kag ginlabo ang magulang.
Nakaangkon ang biktima sang igo sa liog kag likod nga gintunaan sang iya nga kamatayon.
Ginhingagaw pa ini dala sa balaybululngan apang gindeklarar nga dead on arrival.
Suno sa deputy station commander, ang pamilya mismo ni Joven ang nagturn over sa iya sa mga kapulisan.
Sa karun, ginahulat pa ang desisyon sang pamilya kun ila pasakaan sang kaso ang himata nga suspetsado.
