3,500 ka mga persona ang target sang Bacolod City Government nga mangin benepisyaryo sang Bacolod City Comprehensive Health Program (BACCHP).
Suno kay City Administrator Atty. Pacifico Maghari III, 3,500 tanan ka mga indibidwal ang target sang ciudad kag ang una nga tikang amu ang pagpalista sa mga ini sa ila mga barangay.
Suno kay Maghari, gamiton nga base form sang ciudad ang impormasyon nga ginfill-up sang mga pumuluyo sa ila barangay kag kun matapos na ang proseso, sarang na sila nga ma-issuehan sang BACCHP card.
Suno diri, ang requirement agud maka-avail sang nasambit nga benepisyo amu nga dapat residente sang ciudad sang Bacolod ang isa ka persona kag nalakip sa poorest of the poor.
Samtang suno diri initial kag phase 1 pa lamang sang programa ang ginapatigayon nga medical mission kahapon sa Bacolod Government Center kadungan sang paglunsyar sang BACCHP program.
Kaupod sa nasambit nga medical mission ang Jaime Ongpin Foundation kun sa diin may libre nga konsulta, ECG, Urinalysis kag mga bulong para sa mga nagakadto.
Sa Facebook post ni Mayor Albee Benitez, nagpanugyan ini sa mga pumuluyo nga makig-angot sa ila mga punong barangay agud maka-avail sang libre nga konsulta bangud ginadumilian ang walk-in.
Suno sa city administrator, sa dalayon kun matigayon na ang flagship program ni Benitez kag makaavail na sang BACCHP card ang mga benepisyaryo, maka-access na ang mga ini sa mga ospital.
Sa karun nagapadayon pa ang negosasyon sang city government sa mga ospital kag ginascreen pa sang Mayor’s Office kun sin-o ang mga deserving nga benepisyaryo.
