Nag-abot na kahapon sa Bredco port ang dugang nga 3,592 Sinovac vaccine nagikan sa Department of Health.
Sa interview sang Bombo Radyo Bacolod Negros Occidental Provincial Administrator Atty. Rayfrando Diaz, ginpahayag sini nga may yara na sang alokasyon ang bakuna nga nag-abot kahapon sang hapon kag ginbutang sa cold room sang Provincial health Office sang probinsya.
Suno kay Diaz, magasige sige naman ang pagpangbakuna sang probinsya sa mga healthcare professionals bangud ini ang priyoridad sa karun agud nga mahatagan sang proteksyon sa pag-atubang sa mga pasyente sa tagsa ka ospital sa pobinsya.
Nagdangat na sa 175 health care workers ang nabakunahan sa Cadiz District Hospital.
Nadul-ong naman kahapon ang bakuna nga ginpain para sa Valladolid kag Kabankalan District Hospitals.
Ginatigana naman ang vaccine agud mahatag ang second dose sini sa mga natublukan na sang vaccine matapos ang 21 ka adlaw nga nabakunahan ini.
Una naman nga 2700 ka healthcare workers sa 11 ka ospital sa probinsya ang nagpahayag nga mapabakuna.
Ginpahayag man ni Diaz, nga ang mga bakuna nga naga-abot sa probinsya nagikan sa national government ang kabahin sa ginrequest sang probinsya
Nagpanugyan man ini sa mga pumuluyo nga magsunod sa gihapon ang minimum health protocols nga ginapatuman.
