Nagtaliwan na ang 36-anyos nga pasyente sa Purok Tilapia, Barangay 3, Barcolod City, isa ka adlaw matapos magbubo ang bulig nagikan sa mga tagpalamati sang Bombo Radyo kasunod sang panawagan sang iya iloy nga si Gemma Delos Santos.
Madumduman nga nakigbahin sang istorya sa kabuhi si Nanay Gemma sa programa nga Kahapon Lamang kag gilayon nga nagpalab-ot sang bulig ang mga tagpalamati para kay Jesus Delos Santos Jr.
Siya ang nagasuprer sang pneumonia nga gindakop sang tuberculosis, samtang naghubag kag nagbuswang naman ang liog sini kag ilok bangod sa tuman nga ubo.
Kahapon, ginpalab-ot ang una nga batch sang bulig nga gindangop sang pila ka mga maluluy-on nga mga pumuluyo kag support group sa Bombo Radyo Bacolod nga nagdangat sa balor P9,500.
Sa interview kay Nanay Gemma subong nga hapon, ginsaysay sini nga ginsibinan pa sini ang anak takna alas-12:00 sang tungang gab-i.
Natulugan naman ini matapos ang pagsibin bangod nakita man sini nga matawhay ang pamatyag sang bata.
Nakabugtaw si Nanay Gemma alas-3:00 kaina sang kaagahon kag natukiban nalang sini nga wala na nagaginhawa ang anak.
Ginapasalamat nalang sini sa Diyos nga nagtaliwan ang anak nga wala nagaantos sang kasakit kag nagayuhom pa ini sang napatay.
Hugot ang pagtuo sini nga kun nabaton na sang isa ka tawo ang Diyos, indi ini pagpatumbayaan nga mag-antos.
Suno diri, masami ini nga nagapangamuyo apang sang Huwebes sang ginpangamuyuan sini ang anak, nakita sini ang landong sang Ginoo nga nakaputi nga yara mismo sa likod sang anak sini nga si Jesus.
Tuman naman ang pagpasalamat sini sa mga nagbulig ilabi na sa Bombo Radyo nga nangin palaagyan.
Ginatugyan na lamang sini sa Ginoo ang pagbalos sa mga nagbulig kag ginapangabay nga mahatagan pa ang mga ini sang dugang nga kaalam nga magamit sa pagbulig pa sa iban nga kaangay na nagakinahanglan.
Si Jesus ang igalubong sa Lunes, bangod indi na ini pwede madala sa puluy-an kag indi man pwede padugayan.
