36 ka mga successful blood donors ang nagpakigbahin sa Dugong Bombo sang Bombo Radyo in partnership sa Philippine Red Cross nga ginpatigayon sa Barangay Tanza, EB Magalona, Negros Occidental kaina sang aga.
Suno kay Dr. Anna Marie Quilantang, medical officer kag manager sang blood center sang Philippine Red Cross Negros Occidental chapter, ginpahayag sini nga 37 kuntani ang kabug-usan nga nagparehistro apang napaslawan ang isa ka makapasar sa assessment bangud sa medical health condition sini.
Nagpang-agda naman si Quilantang sa iban nga luyag magdonar sang dugo nga magpakigbahin sa masunod nga bloodletting activity nga patigayunon sa Bacolod City National High School sa Oktubre 21 kag 23; Himamaylan City sa Oktubre 27 kag sa banwa sang Cauayan sa Oktubre 28.
Samtang, tuman naman ang kalipay sang mag-iloy nga Marayan nga residente sang Barangay Tanza bangud nga nakadonar sila sang dugo.
Suno sa iloy nga si Leah, isa ka overseas Filipino worker sa United Arab Emirates apang naabtan sang lockdown diri sa pungsod, madugay na ini nga ginahagad sang iya nga bata nga magdonar sang dugo.
Gikan sa simbahan kaina, nalabayan nila sa covered court sang barangay nga may yara sang bloodletting activity gani nga nagdesisyon sila nga magpakigbahin.
Suno kay Leah, first time niya nga magpakuha sang dugo apang nalipay ini bangud nga maislan ang iya nga dugo kag makabulig sa mga nagakinahanglan.
Samtang, tuman man ang kalipay sang 22-anyos nga bata ni Leah nga isa ka nursing graduate bangud nga nakadonar ini sang dugo.
Suno sa iya, madugay na niya ini nga gusto nga himuon apang subong lang natiempuhan.
Dugang pa sini nga nasadyahan gid siya bilang isa ka nursing graduate bangud nga makabulig siya sa mga tawo nga nagakinahanglan.
Nahibaluan nga nakuha ini bilang contact tracer sang DILG.
