Patay ang isa ka 37 anyos nga lalaki matapos gintiro sa syudad sang Bacolod kagab-i.
Sa impormasyon nga nakuha sang Bombo Radyo Bacolod, las-6:00 kahapon sang gab-i sang gintiro-patay ang biktima nga ginkilala kay Joven Bantillo, residente sang Sitio Tinagong Paraiso, Barangay Banago.
Sa interview sang Bombo Radyo Bacolod sa magulang sang biktima nga si Dianne Mendoza, ginpahayag sini nga timprano pa lang sang hapon, nakit-an na sini ang iya manghod nga nag-maoy sa ila Barangay bangud ini ang hubog sa diin iya pa gin-pahanumduman ang biktima nga untaton na ang iya ginahimo agud makalikaw sa pag-pangita sang kontra.
Sang naglakat na si Dianne agud mag-pataya kuntani sang STL, nakabati ini sang lupok.
Kag sa iya pagbalik sa ila Sitio, nakit-an na lang sini ang iya manghod nga duguon na kag gina-karga sa trisikol agud dal-on sa Corazon Locsin Montelibano Memorial Regional Hospital apang ini ang wala na natabangan.
Gina-tudlo naman sa karun sang pamilya sang biktima nga ang suspetsado sa pagtiro-patay sa ila himata, amo si “alyas Junjun buang”.
Padayon naman sa karun ang imbestigasyon sang Police Station 3 sa natabo nga insidente.
