Pilason ang 37 ka indibidwal matapos gintay-og sang magnitude 5.9 nga linog ang nasidlangan nga bahin sang Japan kag nabatyagan man sa Tokyo, kahapon, Agosto 23.
Santo sa Japan Meteorological Agency, yara sa 70 kilometros ang kadalumon sang linog kag ang epicenter ang yara sa southern Ibaraki Prefecture.
Nagtuga ang linog sang delay sa pila ka mga express kag local train services nga nagabyahe padulong sa Tokyo kag Narita Airport.
Apang, normal ang operasyon sang Shinkansen bullet trains.
Nagdeploy man sang task force sa Japan nga nag-examine sa halit nga ginbilin sang linog, samtang nagpaandam naman ang Japan Meteorological Agency nga mahimo maeksperyensyahan pa ang mga pagtay-og sa mga masunod nga semana.
Wala naman sang tsunami threat ukon na-report nga problema sa nuclear power plants sa pungsod.
