Nagdangat sa 372 ka mga explosive device ang ginpalupok sa isa ka quarry site sa Barangay Alangilan, Bacolod City.
Sa interview sang Bombo Radyo Bacolod kay Bacolod City Explosive Ordnance Disposal and Canine Unit head Police Capt. Jester Minguez, ang mga bomba kag iban pa nga explosive devices ang nagikan sa nagkalainlain nga police stations sa Bacolod City kasubong man sang Negros Occidental.
Ginapakamaayo man sini nga sa pagpalupok sang mga explosive devices, mapanubo ang risgo sa Bacolod City Police Office kag Negros Occidental Police Provincial Office.
Apisar nga indi organic member sang BCPO ang Bacolod EOD and Canine Unit, ginapasalamat man sang mga ini nga suportado ni BCPO Director Police Col. Joeresty Coronica ang ila lihok kag gilayon nga gin-aprubahan.
Dako man ang pasalamat nila sa opisyales sang Barangay Alangilan kag tag-iya sang quarry site nga nagsugot nga magamit ang ila area matapos napaathag ang risgo nga dala sang mga explosive devices sa BCPO kag NOCPPO.
Paathag ni Minguez nga sa madugay nga pagstore sang mga explosive devices, ang iban ang unstable na ang materials kag indi mapaktan kun san-o mahimo magsigabong.
Suno kay Minguez, may mga nabilin pa nga explosive devices sa kustodiya sang BCPO kag NOCPPO partikular na ang mga nagaserbe ebidensya sa mga kaso.
Apang kun makita nga mataas ang risgo nga mahimo maglupok ang ebidensya sila ang makarequest man sa korte para sa disposal agud wala na sang mahalitan nga propedad kag kabuhi.
