Ginbawian sang kabuhi ang 38 anyos nga lalaki matapos ginpahayag nga naglumpat sa pier sa San Carlos Port sang San Carlos City kahapon sang udto.
Ginkilala ang biktima kay Rasario E. Tabio Jr., 38-anyos apang wala pa matumod ang iya nga address.
Sa interview sang Bombo Radyo Bacolod kay Commander Jansen Benjamin, commander sang Coast Guard Station-Northern Negros Occidental, nakabaton sila sang report nga may yara sang napatay nga persona matapos maglumpat sa pantalan.
Suno kay Benjamin may nakakita nga gwardiya nga naggawad pa ini sang ticket kag naglakat sa punta nga bahin sang pantalan sa LS San Carlos kag gilayon nga naglumpat sa tubig nga wala sang bisan ano nga rason.
Suno diri, nasapwan nalang sang security guard kag katapo sang San Carlos City Disaster Risk Reduction Management Office nga nagalutaw ang biktima.
Gindala pa ini sa ospital apang gindeklarar nga dead on arrival.
Bangud sa insidente nagpanugyan si Benjamin sa mga pasahero nga kun may yara sang ginadala-dala nga problema, nga gina-agihan man sang tanan, yara ang mga otoridad nga nakahanda magbulig.
